الأربعاء، 28 مارس 2007

متظلميش نفسك...........(قناعتى)0



كنت بكلم صديقه لسه خارجه من قصه حب فاشله ومعظم قصص الحب بتفشل دلوقتى مش علشان عيب فى الحب العيب فينا اننا بنفتكر انه حب بجد المهم بتقولى انا هرتبط بعد كده من غير حب هسيب بابا يختارلى المهم يكون كويس مش عارف ليه الانسان بيحزن لما يكتشف ان اللى بيحبه كان بيخدعه او انه مش بيحب بجد المفروض يفرح لان اكتشف الخدعه قبل اى ارتباط ومش معنى انه اتخدع مره انه هيتخدع تانى بالعكس التجربه بتفيد المراه فى حاجات كتير بس تتعلم منها وتفهمها كويس مش تفشل فى قصه حب تتجوز اى انسان وخلاص كده بتظلم نفسها وتظلم انسان تانى وكتبت دى يمكن ترجع عن اللى فى دماغها وتستنا تلاقى حب حقيقى


النهارده يوم فرحها
هتتجوز غيره علشان جرحها
هو غلط صحيح وخانها
كلام حبه دخان خنقها

لاكن يا حبى اتظلمتى مره
ليه تظلمى واحد تانى
خليكى مش مسجونه حره
استنى قلب صادق وحدانى


اه عطتيه كل حنانك
سرق منك احلا ايامك
اتارى احساسه بس كلام
مقدرش يقدر حلاوه احساسك

لاكن يا حبى اتظلمتى مره
ليه تظلمى واحد تانى
خليكى مش مسجونه حره
استنى قلب صادق وحدانى


بعد خيانته صحيح سبتيه
لاكن جرحه مش قادره تنسيه
مفيش حب دلوقتى رائيك
مش مهم مين هتتزوجيه

لاكن يا حبى اتظلمتى مره
ليه تظلمى واحد تانى
خليكى مش مسجونه حره
استنى قلب صادق وحدانى


فاكره ان احساسها مات
بتقول لروحها الوقت فات
مش عارفه ان جواها عشق
عاوز يدوب فى حضن سنوات

لاكن يا حبى اتظلمتى مره
ليه تظلمى واحد تانى
خليكى مش مسجونه حره
استنى قلب صادق وحدانى


ذنبه ايه الشخص التانى
هيقولك مره انتى رفضانى
ايوا عايش مع جسدك بس
بتكونى بعيده وانتى فى احضانى

لاكن يا حبى اتظلمتى مره
ليه تظلمى واحد تانى
خليكى مش مسجونه حره
استنى قلب صادق وحدانى


وترجعى تانى تشوفى الحكايه
هيدور على الاحساس بالخيانه
لان اللى بينكم مجرد بيت
عايشه فيه اروحكم عطشانه

لاكن يا حبى اتظلمتى مره
ليه تظلمى واحد تانى
خليكى مش مسجونه حره
استنى قلب صادق وحدانى


عاوز اسمع صوت قلبك
دنيتك بس مع اللى يحبك
العمر يجرى سبيه يجرى
استنى ثانيه حبيب بقربك
اوعى يا حبى تتظلمى مره
تيجى تظلمى واحد تانى
خليكى مش مسجونه حره
استنى قلب صادق وحدانى


اه على فكره البنت دى اللى تعبت نفسى وكتبتلها اتخطبت ورضت بخطيب .. على رائيها كويس ومحترم وهتحبه بعد الجواز الظاهر اللى كتبته محرك فيها اى شئ ولا وصلها شئ



هناك 16 تعليقًا:

اجندا حمرا يقول...

عزيزي حسام
لما الواحده بتكون طالعه من تجربه حب فاشله بتكون الدنيا مضلمه قدامها و مابتكونش شايفه اي حاجه حلوه و الحياه عندها بتتساوي مع الموت و ممكن تعمل اي حاجه و هي في الحاله النفسيه دي
فلما بتكون واحده خارجه من قصه حب فاشله بتقول انا توبت عن الحب انا حرتبط بأي حد و السلام بلا حب بلا نيله
طبعا مش صح بس في نفس الوقت هي مجروحه و اعتقد انها لازم تد لنفسها و لقلبها الوقت الكافي لحد ماجرحوحها تخف و تبتدي تحس بقلبها من اول و جديد بيدق
صعب نظلم حد معانا و نتجوزه لمجرد انه بيحبنا
و لمجرد اني بحب حبه ليا مش صح ممكن بعد العشره نبتدي نحبه؟ممكن اه و ممكن لأ
صدقني الناس مختلفه في احاسيسها و مشاعرها و عمرك ماحتقدر تقول لحد يعمل ايه لان لا انا و لا انت عارفين و حاسين بمشكله الشخص اكتر منه و الكلام اللي بنقوله لصديق او صديقه في وقت شده بيكون نابع من اننا عايزين نحسسهم اننا معاهم بس عمر مابيحس بالالم و الاه الا الشخص الموجوع

Lava يقول...

صديقي العزيز
قصص الحب الحقيقي مش بتكون فاشلة
وعشان كده كلامك صح جدا ان العيب فينا اننا بندخل قصص نفتكر انها قصص حب بجد وهي مش كده
ساعات احنا بنوهم نفسنا بنفسنا
ودا مش معناه ان مفيش جرح ووجع والم
بالعكس الانسان ممكن جدا ينجرح وينصدم من فساد نفسية ناس يعرفهم حتى لو كانوا ملهمش اي أهمية حقيقية في حياته يعني لا حب حقيقي ولا حب صداقة ولا اي حاجة
فما بالك لو عندك مشاعر حلوة سميناها مجازا حب ناحية حد وتفشل فيه؟
لكن الكارثة الاكبر من اننا نفشل في اي شيئ سواء علاقة او خطوة في حياتنا
اننا نرمي نفسنا في دوامة لا تنتهي من التعاسة باننا نكون مع انسان مشاعرنا تجاهه حيادية او لا مبالية ونقول انه كويس ومحترم .. الخ على امل اننا يوما ما نحبه
لكن ارجع واقولك ان الانسان حر في اختياراته
وهو وحده اللي بيتحمل مسئوليتها ومفيش على اي انسان قدامه بيعزه وبيتمنى سعادته ومصلحته غير انه ينصحه وبس
واهم نصيحة هنا انه ياخد وقت كافي جدا لغاية لما آثار التجربة السابقة تبقى مجرد ندبات غير ملحوظة وذكريات لا تحمل في نفوسنا اثر حقيقي لانها فعلا انتهت من جوانا
اما التاني اللي هي هتظلمه دا برضه اختياره اللي اكيد مكنش اساسه الحب المتبادل المتوازن لكن حسابات تانية هم بس اللي هيجنوا ثمارها
فمحدش هيظلم حد
احنا اللي بنظلم نفسنا
واللي يقدر يراجع نفسه قبل ما يدخل في الدوامة .. يراجعها
لان اكتر شيئ بجد بيحزن قلبي لما اشوف ناس كبيرة في السن وفي الخبرة وعايشين في الحياة توديهم هنا وهناك بيحاولوا يضحكوا على نفسهم بأي حاجة عشان ينسوا انهم في تعاسة
والكارثة الحقيقية انهم شايفين ان مش بايديهم يغيروا اي حاجة خلاص لمليون سبب وسبب
وان لازم يكملوا الطريق
انا قلبتها نكد على نفسي وعليك بحواديت افتكرتها عن ناس مش فاكراهم وياللا تستاهل عشان تبقى تقولي ارد مرة تانية
:)

محض روح يقول...

عودا احمد يافندم

المشكله مش فى البنت ديه لوحدها
هيه فشلت وممكن تكون اتظلمت بس المشكله القاتله
لما تطلع من بتجربه فاشله زى ديه بيكون عندها
نوع من انواع الحسره حاسسها انها مش مرغوبة
احسسها انها ادت ومخدتش
ومن هنا بيجي التخبط
هيه اكيد لسه عندها ترسوبات
من الماضى
والموضع ده مقصر عليها
بس هيه اختارت مثل
داويني بالتي كانت هي الداء
هيه انجرحت منه واخترات انها تداوي برضه
منه

وممكن تكون مش حسه انها بتظلم الشخص ده
على العكس
هيه حسه انه بيحبها ووجدها جنبه بيسعده
وحبه ليها مديها ضمنات نجاح
وفى النهايه
ادام هيه اخترات خلاص يبقى ادعلها
ربنا يوفقها
و مش مستبعد يكون فشلها ابل كده
دافع ليها انها تنجح

تحياتى يافندم

Hosam يقول...

عزيزتى
اجندا حمرا
يا بنتى ما انا بقول متظلميش نفسك ولما تخرجى من تجربه حتى لو كنتى الدنيا مضلمه قدامك وحالتك النفسيه زفت ما تعمليش اى حاجه خلى الضربه اللى تخديها تقويكى متكسركيش امال الكلام اللى بنقوله لصديق وقت الشده مش كلام وبس واحساس تمثيلى بنحاول نقولهم اننا معاهم احنا بنديهم رائينا ونصحتنا وهما حرين يعملوا بيها او لا النصحيه لازم نكون صادقه ومن القلب مش مجرد واجب بنعمله بس
سلااااااااااااااااام يا بطه

Hosam يقول...

عزيزتى
Lava said...
قصص الحب فاشله كتير حتى لو مكنش حب حقيقى كفايه انه فضل شهر او سنه جوانا كانه حب احلى حب يبقا فشل اكيد والتعاسه هتاخد وقتها وكل ما كان الانسان قوى وواثق فى نفسه واحساسه كل ما المفروض احساسه بالفشل يقل وعلى رائيك لازم ياخد وقته وبعد مده يراجع اللى جواه كويس اما اللى السن بيجرى بيهم دى مشكله لان العمر بجد بيجرى ومحدش عارف يحس بيه ويوقفه واللى حساه نحيت غيرك واللى شيفه عمرهم جرى بيهم بكره تشفيه فى حياتك وتقولى العمر جى بيه بسرعه اوى
سلااااااااااااااااااام

Hosam يقول...

عزيزتى
محض روح
متشكر على سؤالك دايمن وده بس من احساسك الجميل اما موضوع الثقه بعد التجربه الفاشله بتضيع للانسان اللى مش عارف يقيم التجربه صح لازم بعد اى تجربه نراجع نفسنا كويس ونشوف الغلط كان فينا منننا ولا من اللى حبناه اما اختيارها الارتباط من غير حب مش مشكله المشكله انها اختيار بيكون سريع وده بيخلينا نختار اى حد مش لازم نحب اللى نرتبط بيه بس لازم نحس اننا عاوزين نرتبط بيه وشيفين اننا ممكن نحبه بعد كده لاكن الارتباط بعد التجارب الفاشله دايمن بنختار اسف مش بنختار بنسيب غيرنا يختارنا وبس وده بيكون بدايه لنهايه لقصه فشل تلنيخ بس بيكون وجعها اكبر وربنا يوفق الجميع
سلاااااااااام يا قمر

محض روح يقول...

فينك
ليك كتير مختفي يارب تكون بخير

رينـــــــــــا يقول...

هى دى نتيجه الصدمات الطبيعيه
لاتندهش دا تفكير البنات الا من رحم ربى

نونا يقول...

صديقي العزيز حسام ميرسي اوووووووووووووووووووي بجد على اهتمامك بيه وعاوزه اقولك ان دي يمكن اول مره اختار صح وجات بالصدفه وانه من حبه ليه خالاني غصب عني احبه والحمد الله حياتانا كويسه بس ادعيلنا

Hosam يقول...

عزيزتى
نونا
يمكن انتى حظك كويس واختيار الصدفه طلع كويس وعرفتى تحبيه
لاكن اختيار الصدفه لألاف غيرك صعب يطلع كويس وبيطلع عنيهم بعد كده
ربنا يوفقك ويكبر حبك اكتر واكتر
سلااااااااااام

buffy يقول...

صعبة موووووووووووت انا عمرى ما اتخيل نفسى بتجوز من شخص عمرى ما حبيته بس مش عرفه اقول ايه تانى للدرجة دى الحب بيوجع زى ما بيسعد

صوت بلا صدى يقول...

جميلة جدا مدونتك يا حسام .. ارجوك تزورنى فى مدونتى .. وتقوللى رأيك


http://b7rel5of.blogspot.com/
غازى

احساس لسه حى يقول...

عزيزتى
buffy
شوفى مش صعبة اوى تتجوزى حد مش بتحبية بدل مش رفضاه

لاكن انك رفضاه وتتجوزيه او مش حسه نحيته باى شئ ده الصعب قوى

الحب بيوجع لما يكون طرف مش صادق بجد او مش بيحب بنفس درجة حبك ليه لازم فى الحب يكون فيه توازى فى المشاعر

تحياتى

سلام

احساس لسه حى يقول...

عزيزتى
صوت بلا صدى
متشكر قوى بس المدونة كلها مش يمكن تلاقى حاجه مش هتعجبك

على العموم تبقى تقولى رائيك فى البوست اللى تقرية بس احسن

واللى مش يعجبك قوليلى يا رب الكل يعجبك

وجرى ازورك
نورتينى

سلام

لولا يقول...

جميل اوي كلامك يا حسام
بس بجد هي ظلمت نفسها
هي بتقول انها هتحبه بعد الجواز مش يمكن متحبوش وحبها الاول يفضل ساكن جواها وتبقى ظلمت نفسها وظلمت جوزها معاها زي ما قولت وممكن يحصل انفصال
وممكن تتعود عليه وخلاص لان في الغالب الحب بعد الجواز مش بيقبى حب بيبقى تعود وعشرة واولاد لازم تستحمل عشانهم

وممكن هو يحبها وينسيها جرحها
كله ممكن وكله جايز

بس في ناس بتظلم نفسها بجد يعني فشلت في تجربه فمبتقاش فارقه معها بقى اي حاجه واي حد
مش مهم

تحياتي ليك

شروق الامل يقول...

السلام عليكم على فكره ارائكم عجبتني جدا وعشان كده انا حبيت اشارك معاكم براي انا واحده من الناس اللي حبت بقوه وبكل حته فقلبها بس للاسف الحب ده مكانش في المكان ولا للشخص الصح وكمان كان حبي الاول يعني كان بالنسبه لي مدرسه الحب اللي اتعلمت فيها معظم معاني الحب وفعلات تعبت اوي واتوجعت اوي اوي وده لاني بجد حبيت اوي بس فعزالمي وغربتي اللي كنت حاسه بيها وانا فوسط الناس كنت عارفه ومتاكده ان ده خير ليا وان ربنا اكيد شايلي الاحسن وده اول حاجه الواحد لازم يفكر فيها عشان يقدر يقوي ويعدي ويكمل اه تعبت اه صرخت مش بس بكيت وفعلا حسيت ساعتها بس اد ايه الاه بتريح وبتهدي النار المولعه لما بتتقال بس فعز ده كله مسبتش نفسي للياس فعز ده كله واكتر منه كان عندي يقين ان هلاقي الشخص الصح اللي يديني الحب واديهوله زي ما كنت بتمنى
القصد من كلامي ان الواحد لازم يكون عنده امل وميسيبش نفسه للياس اللي هيخليه يضيع ايام من عمره زي ما ضيع قبل كده ويخليه يعيش حياه كان ممكن يعيشها احسن لو كان عنده شويه امل وصبر كده وفعلا حصل اللي انا كونت متاكده منو ولقيت الشخص اللي احبه واديله حبي الشخص اللي فعلا يستاهل قلبي وروحي وساعتها اتاكده ان ربنا معملش كده غير لانه شايلي الاحسن هو اي نعم في الاول كان في مقارنه بس الحمد لله فتره وراحت لحالها وادعولنا ربنا يتمملنا على خير وربنا يوفقكم جميعا سلااااام

مدوناتى واللى فيها أتفضلوا (حسام)

يا ..... عالم